TUA is GREEN . . . Ako ay IN!

Isang napakainit na usapin sa kasalukuyan ng pangangalaga sa kalikasan – usaping hindi maitatangging malaki ang kaugnayan sa ating buhay at kabuhayan. Sa larangan ng akademya, iba’t ibang subject ang tumatalakay rito gaya ng Ecology, Environmental Science, Environmental Communication, Environmental Sociology at kung anu-ano pa. Isang malinaw na katibayang patuloy at lalo pang nililinang ng akademya sa antas teyoretikal ang pagiging mapagmahal at mapangalaga sa kalikasan.

Bawat isa sa atin ay malinaw na bahagi ng mundo – may tungkuling ginagampanan upang maisaayos o sirain ang kalikasan. Isa sa pangunahing kadahilanan kung bakit tumaas ang antas ng kamulatan sa kalagayan ng kalikasan ay dahil na rin sa pinsala sa sambayanan bunga ng kalikasan. Mistula bagang naniningil ang kalikasan sa kapinsalaang gawa ng tao sa kanya.

Lubhang napakarami na ng maaaring sabihing kasalanan ng tao sa kalikasan gaya ng mga sumusunod: 1. ang simpleng pagtatapon ng iba’t ibang uri ng basura kung saan-saan na maaaring magdulot ng pagbabara ng mga daluyan ng tubig; 2. ang walang habas na pagputol ng mga puno sa kabundok na nagdudulot ng malawakang pagbaha sa kapatagan; 3. ang malawakang pagmimina ng mga likas na yaman ng bansa na nagdudulot ng pagpatag o pagbutas sa mga kabundukan na maaari ring magdulot ng pagbabaha at pagkalason mula sa mga kemikal na ginagamit dito; 4. ang kawalan ng plano ng pamahalaan hinggil sa pagpapatayo ng pabahay kung saan-saan na nagdudulot ng di mabilang na kalamidad; 5. ang kawalan ng maayos na imprastraktura hinggil sa tamang daluyan ng tubig patungo sa karagatan; 6.ang pagiging makasarili na iniiisip lamang ang kung paano kikita ng kamal-kamal na salapi kahit na isaalang-alang kaligtasan ng maraming mamamayan at ng kalikasan; 7. ang patuloy na paggamit ng mga bagay na may masamang epekto sa kalikasan; 8. ang kawalan ng disiplina ng marami nating mamamayan; at marami pang ibang mga kaganapang patuloy na sumisira sa ating kinabukasan. Hindi lamang tayo ang nakararanas nito. Suliranin din ito maging ng maga malalaki at mayayamang bansa. Isang pagpapatunay na lahat ng naririto sa daigdig ay dapat gumawa ng hakbang upang muling ibalik ang dating ningning ng kalikasan o kung hindi man, ay magawa nating pantay ang lahat.

Dapat isipin nating lahat na hindi sapat na alam lang natin kung ano ang dapat gawin. Hindi sapat na maituro lamang sa atin samantalang hindi naman natin gagawin – PRAXIS ‘ika nga. Sa programa nating TUA is GREEN, malinaw rito na maging sa ating paaralan, dapat nating gawin ang nararapat para sa ikapanunumbalik ng kaayusan hinggil sa kalikasan at ikagaganda ng buhay ngayon at sa darating na bukas. Umasa tayong maraming mga pagbabago ang magaganap sa ating pamantasan hindi dahil sa nakikiuso lamang tayo kundi ito ay isang pangangailangan dahil ang Trinitian ay may puso at damdamin para sa kalikasan at kinabukasan. Nananawagan ako sa ating lahat na sama-sama natin itong gawin hindi lamang para sa atin kundi lalo’t higit para sa mga susunod na salinlahi. Manindigan tayo, kumilos at gawing TUA is GREEN at sabihing AKO ay IN!